Bjarnikeyrari

Kannast einhver við þetta?

Í símanum hljómar misgáfuð lög og reglulega mætir hljómfögur dama og segir „Í augnablikinu eru allir þjónustufulltrúar uppteknir. Við bendum á að hægt er að ganga frá greiðslu áskriftar í verslunum Vodafone, afgreiðslu Mömmu Krókhálsi, Skífunni Laugarvegi eða á netinu. Slóðin er stod2.is og syn.is.“

Sýn2 datt út í gær eftir að ég skilaði 365 myndlyklinum. Virtist sem ég hafi verið misskilinn. Ég var ekki að segja upp áskriftinni heldur að skila myndlyklinum því ég næ Sýn2 í gegnum myndlykil frá samkeppnisaðilanum.

Búinn að bíða eftir þjónustufulltrúa núna í 3 korter og er enn að bíða...

Af nöglum

Við bíllinn fórum út á lífið um daginn, alla leið í Nóatún. Á leiðinni hellirigndi, að mér fannst og loksins fengu rúðuþurkurnar eitthvað að gera. Það var risaþægilegt að koma út í rigninguna, ekki það að sólin stendur fyrir sínu þegar hún lætur sjá sig. Það lifnar allt við, græni liturinn sterkari, lyktin unaðsleg og fersk.

Var að naglhreinsa í gær með Kristínu í stanslausri rigningu. Náðum að hreinsa alla sýnilega nagla (hættulega mikið af „sýn“ í blogginu hjá mér; mætti halda að ég væri að auglýsa Sýn² eins og félagi minn Kjartan Due Nielsen). Nú er búið að rífa niður alla stillansa í kringum húsið; næsta verk er að steypa undirstöður fyrir pallinn en steypustoðirnar eru komnar í jörðu. Vá hvað verður gaman þegar pallurinn verður kominn og sólívari fyrir flýtiloftinu.

Fór svo í manngerða sturtu og fékk mér að drekka. Þá hringir Björn Sigurjóns klukkan rúmlega 5, þá mættur á Kaffitár í Bankastræti þar sem við ætluðum að hittast. Svo mætti ég kl. 17:37 og Björn hinn rólegasti að lesa ljóðabók eftir vinkonu sína. Ég var búinn að gleyma þessari áætlan okkar, reyndar í síðustu viku hélt ég að við ætluðum að hittast og var í startholunum þegar hann benti mér á að við hefðum ákveðið gærdaginn. Björn er þessi manngerð sem maður vill eiga sem vin enda traustur og húmoristi. Þó hittumst við lítið en örugglega og alltaf jafn ánægjulegt. Hann er farinn að ljósmynda og hefur haldið sýningar sem ég hef misst af. Stefni á að fara á næstu sýningu hans en myndirnar rokseljast svo það hlýtur að vera eitthvað í myndirnar spunnið. Ég veit þó hvenær við hittumst næst; 6. október enda mun hann þá halda upp á RISA afmæli þó afmælisdagurinn sjálfur hafi verið 16. júní. Til hamingju Björn.

Eftir annasaman dag skellti ég mér í hugleiðslu hjá Hugleiðslu- og Friðarmiðstöðinni. Gekk illa að róa hugann enda hátt uppi af sælu að sjá fyrir mér kvonfang. Eftir hugleiðsluna spjallaði ég við nöfnu mína sem mér fannst vera kunnugleg og spurði hana hvort ég hafi séð hana þegar ég tók umhverfisfræðikúrs í líffræðiskori. Það stóð heima og kom meira að segja á daginn að hún er systir Svanhildar á Námsmatinu. Það er margt sameiginlegt með þeim. Fyrir utan að vera báðar hávaxnar hafa þær keimlíkan húmor og talanda.

Stjarnfræðilegar pælingar

Skrapp með mömmu austur fyrir fjall til Gunnþórs og fjölskyldu. Þegar við komum í stofuna blasti við okkur RISA stjörnukíkir sem Rebekka Sif fékk í afmælisgjöf. Hlakka til að fá stjörnur í augun þegar viðrar vel til loftárása og skilyrði góð til að kíkja á himingeiminn. Rebekka gaf mér svo rós í hnappagatið sem hún ræktaði sjálf og hafði pakkað inn í sellófón.

Horfðum á Victortia comes to Amerika. Ég vil ekki meina að kryddið sé heimskt en rosalega lagði hún mikið upp úr því að heilla kanann í borg englanna. Hún var að leita að hreiðri fyrir fjölskylduna og í þeirri leit tókst henni að fanga athygli löggunar sem benti henni á að spænska ökuskírteinið gilti ekki í landi frelsisins og tækifæranna Næst var sýnt frá því þegar hún tók bóklega prófið og var með heimilishjálpina í metersfjarlægð svona til að fá hjálp við erfiðu spurningarnar. Yfirsetukallinn gerði athugasemd þegar þær voru á spjalli en hún sagði að þær hafi verið að fjalla um hártískuna. Jeræt.

Stoppaði 2x á leiðinni í bæinn til að taka ljósmyndir af stórkostlegri litablöndu skaparans þarna uppi. Hvernig fer hann að þessu? Þessi sýn var alveg á heimsmælikvarða og geri aðrir betur.

Er að sjá fyrir endann á sýninni

Jæja, nú er ég kominn með nýjan afruglara og búinn að skila þeim gamla til að ná leiknum um Samfélagsskjöldinn í dag. Beið með að tengja þann nýja þar til þau hjá 365 opnuðu fyrir Sýn2 sem var víst í gær.

Ég tengdi og tengdi og er enn að tengja en engin Sýn2 í mínu sjónvarpi. Beið í símanum í 15 mín eftir þjónustufulltrúa fyrir mat án þess að ná sambandi. Eftir matinn beið ég í 45 mín og þá loksins, loksins gerðist eitthvað og dama mætti í símann að svara langþyrstum fótboltaáhugamanni. Fórum yfir stöðvarnar sem ruglarinn gaf upp (bara tíðnisvið, ekki stöðvar). Niðurstaðan: Ég er ekki með örbylgjuloftnet en næ sjónvarpinu með breiðbandinu.

Möguleikarnir: Fá mér örbylgjuloftnet eða afruglara hjá Símanum. Já, auðvitað. Sýn2 næst ekki í gegnum breiðbandið með afruglara frá 365. Þetta átti ég auðvitað að vita.

Nú er að húrra kl. 10 í Kringluna að sækja aftur afruglara hjá Símanum og borga 563 kr. á mánuði í leigugjald til að horfa á sjónvarpsefni hjá samkeppnisaðilanum. Þarna bætast 5630 kr. yfir veturinn og enski boltinn þennan veturinn því kominn í 4733 kr. á mánuði í stað 4170 kr.

Rétt sýn

Fékk ábendingu hér á blogginu við síðustu færslu að ég gæti fengið mér Sýn og lækkað við það kostnað á Sýn2. Ég hafði þá samband við áskriftardeild Sýnar og það stendur heima.

Geri maður heilsárssamning að áskrift að Sýn2 borgar maður 4171 kr. á mánuði í stað 4390 kr. Það gerir 50.022 kr. á ári.

Taki maður Sýn með í heilsársáskrift þá gerir það 7112 kr. á mánuði (8890 kr. án heilsárssamnings). Það gerir 85.344 kr. á ári.

Heilsársbinding enska boltans á Skjásporti kostuðu mig 28.092 kr. Mismunurinn eru 57.252 kr. á ári eða 4771 á mánuði milli þess að vera með Skjásport og Sýn+Sýn2. Vissulega miklu meira af sporti á Sýnarrásunum en ég er bara að sækjast eftir enska boltanum og fyrir það þarf ég að greiða 1830 kr. meira á mánuði. Allt blaður íþróttafréttamanna mætti koma frá Englandi. Þeir eru ekkert síðri án þess að ég vilji gera lítið úr íþróattafréttamönnum hjá 365.

Ný sýn á ný

Nú líst mér á mína menn. Búnir að ná í Spánverjann Fernando Torres frá Atletico Madrid, hinn hollenska Ryan Babel frá Ajax og ísraelska Demantinn Yossi Benayoun frá West Ham sem skrifaði undir í dag.

Það eru ekki nema 30 dagar í að óléttan á SÝN² springi út. Þvílíkt tilhlökkunarefni og ég get varla beðið Eini gallinn við þetta allt saman er að nú þarf ég að borga 4.390 kr. í stað 2.341 kr. á mánuði. Þetta gera 24.588 kr. mismun á ári. Hverju á ég að sleppa í staðinn?

Frá brúðkaupi í Guðsgrænni að Gáseyri

Síðasta föstudag rallaði ég með mömmu norður í land. Tilefnið var brúðkaup Ómars frænda og Rutar.

Rall er kannski ekki rétta orðið því mamma er orðin svo dönnuð að hún hélt sér á löglegum hraða langleiðina, eða þar til Hanna tók fram úr henni. Þar flaug skynsemin, kannski vegna þess að ég var að stríða henni svolítið. Hringdi í hana, hún tók upp símann en fattaði fullfljótt hvað væri í gangi. En mikið óskaplega hló hún skemmtilega mikið eftir þetta. Ég fílaði það í tætlur.

Á laugardeginum fórum við Kristín, Björn og stelpurnar á Húsavík og kíktum til Róberts og Selmu. Þau búa á frábærum stað á Húsavík, í vel innréttað hús með góðum palli á skjólstæðum stað og alles. Gæti alveg hugsað mér að búa þarna. Róbert er sjávarútvegsfræðingur og rekur fiskvinnslu; hann sagði okkur Birni að kvótinn hefði þrefaldast á þremur árum. Hvaða rugl er það?

Þá var brunað á Akureyri, skellt sér í nýju gráu jakkafötin og vorum komin að Gáseyri rétt fyrir kl. 17:30. Sá þar að ef ég hefði viljað vera eins og allir hinir þá hefði ég átt að mæta í þeim svörtu. Skondið hvað tískan er einsleit hér á landi. Ætla mér að nota þau svörtu við jarðarfarir og eiga þau lengi og því keypti ég þessi gráu. Það er líka svo mikið búið um að vera hjá mér að undanförnu, jarðaföt, fertugsafmæli og brúðkaup þannig að ég þarf að eiga slitsterk föt eða nóg af þeim

Ómar var að sjálfsögðu mættur í eigið brúðkaup ásamt um 100 gestum. Rut kom svo á brúðabílnum, stórum Scania trailer, sem var skreyttur tilheyrandi skrauti; reyndar engar dósir í eftirdragi en aftan á bílstjóraklefanum stóð: Ný gift. Gaman að því hvað þetta var allt saman frumlegt. Þetta var annað útibrúðkaupið sem ég fór í. Pabbi og Atie giftu sig við Þjórsá fyrir 20 árum síðan.

Hafði heyrt af því að Ómar myndi sjá fyrir nægri söngolíu í veislunni sjálfri og það stóð heima. Kampavín í fordrykk, rauðvín og/eða hvítvín með matnum, ljóblá bolla og bjór eftir mat, lá við í tonnavís.

Fór tvisvar í sundur í Akureyrarlaug sem að mínu viti er ein besta laug landsins, lítil hætta á að detta á sleipum gólffletinum og nóg af tækjum og rennibrautum fyrir smáfólkið. Tinna fór í regnbogabrautina og svo viðstöðulaust upp aftur þegar hún kom niður. Ég náði að synda samtals einn km í lauginni en sund er ein besta hreyfingin sem völ er á. Svo sækir maður brúnku þegar sú gula sýnir sig líkt og hún hefur gert að undanförnu

Hin fertuga Anna

Hún Anna systir mín tók upp á því sl. sunnudag að verða fertug. Hún hélt upp á það sl. laugardag með pompi og prakt á Sólon. Hennar nánasta fjölskylda og vinir komu upp úr kl. 18 og hún bauð upp á þrírétta máltíð sem var meira en lítið ljúffeng. Fordrykkurinn var ekki síðri.

Hún mætti á svæðið með nýja klippingu og nýjan kjól utan um bumbubúann. Vá hvað hún var flott. Eitt það fallegasta sem ég sé í þessum heimi eru óléttar konur. Hún er sko ólétt og á að eiga í september. En það besta við hana í veislunni var hvað hún var létt, þrátt fyrir að vera ólétt (hver samdi þetta tungumál, sko íslenskuna?).

Svo komu aðrir gestir upp úr kl. 21, m.a. eitt gæsadæmi með tilheyrandi látum. Eftir Sólon fórum við systkinin, fyrir utan Önnu, á Q-barinn. Tónlistin þar var að megninu til frá 9. áratugnum sem var fínt fyrir okkur gamla liðið. Dönsuðum frá okkur allt vit, mátti reyndar ekki við því en ég var svo búinn í löppunum að ég fór út og sat í veðurblíðunni. Fékk far heim með Gunnþóri, Kristínu og Tóta kl. 4 sem er bara nokkuð snemmt. Á tveimur djömmum þar á undan kom ég heim um kl. 6 þannig að eigum við ekki að segja að ég sé að þroskast.

Enn og aftur til hamingju systir góð.

Passadagur

Nú er ég í hlutverki passasams manns. Er svo lánsamur að passa að Andrea frænka mín geri ekki einhvern óskunda, sem sagt að hjálpa henni að skunda.

Fyrsta skundið fólst í að reikna sem henni finnst mjög gaman. Hún reiknar nú í bók sem heitir Stærðfræðisnillingarnir, dugir ekkert minna.

Annað skundið felst í að elda. Það skund skal vera bragðgott eftir staðgóðan morgunverð en staðgóður morgunverður merkir næringaríkur morgunverður (vissi það ekki áður). Stefnir í að hádegismaturinn samanstandi af pylsum, þær eru ágætar þó deila megi um hollustuna.